એક અલ્લડ છોકરી

ગરબે ઘૂમવાને હાલી
એક અલ્લડ છોકરી શમણાંઓ આંજી

હૈયામાં રાખી ભીનાશ
એણે આંખ્યુંમાં આંજ્યો ઉજાસ
એના અંતરમાં રમવાના એવા છે કોડ
જેમ વૃંદાવન જામે છે રાસ
એનાં મનડાંનો ભાર થયો ખાલી
જ્યારે ચાંદલીયે ખીલી રાતરાણી
                           ...ગરબે ઘૂમવાને હાલી

એના હૈયે છે આયખાનો ઉત્સાહ
ને કમખે છે જોબનનો ભાર
સજી મઘમઘતો મોગરો ને ઝગમગતો હાર
એણે અપ્સરા સમ સર્જ્યો શૃંગાર
એના ગરબામાં થાય નૃત્યની લ્હાણી
પછી નજર્યુંના બાણ એ તો ખમતી ચાલી
                                ...ગરબે ઘૂમવાને હાલી

© વિજય રોહિત, 27/09/2017

નવરાત્રિ, ૨૦૧૭