આ વરસાદ એ ખરેખર તો પાણીના બિંદુ નથી પણ કેટલીય આશાઓ,

આસ્થાઓ અને શ્રદ્ધાની ભક્તિનો પરસાદ છે. એનો લહાવો લેવું
એ સૌના નસીબમાં નથી હોતું,

એટલે તો હિતેન આનંદપરા કહે છે કે,

કામ પર જાવાનું મન થાતું નથી તો નહીં જઉં,

બહુ જ થોડા જણને આવું પરવડે વરસાદમાં

અમુક વ્યક્તિઓને પ્રકૃતિ સાથે જાણે સંબંધ જ ન હોય એમ લાગે.

હજી વરસાદની શરૂઆત થઈ ના હોય ત્યાં રેઈનકોટ, છત્રી તૈયાર જ રાખે. રખેને આજે જ દેવા માંડે તો...

કેટલાકને તો વળી વરસાદમાં પાણીથી, ભીંજાવાથી, બહાર નીકળવાનું મન ન થાય આવી ઘણા બધા પ્રકારની એલર્જી હોય છે. પણ મિત્રો આવી બધી જ એલર્જીના આવરણરૂપી રેઈનકોટને એકવાર ફગાવી દો અને મુક્ત ગગનના પંખી કે પેલા બાળપણમાં ચડ્ડીભેર ન્હાતા હતા એવા બાળકને યાદ કરી ભીંજાજો......
અને હળવેથી તમારા દિલને પૂછજો, `અબ કૈસા Feel હો રહા હૈ ?

'મને ખાતરી છે કે જવાબ કાંઈક આવો જ મળશે...

I really feel better.

વિજય રોહિત,

મો : 0990 950 2536

રેઈનકોટ

ભર વરસાદમાં કોરાકટ્ટ જતાં એક સજ્જનને વાદળીએ

ધીરેથી પૂછ્યું,``વાહ, તમે તો સાવ કોરા ને કોરા રહ્યા''

સજ્જને ઠાવકાઈથી જવાબ આપ્યો, `આ બ્રાન્ડેડ રેઈનકોટનો કમાલ છે.'

એટલે ફરી વાદળીએ ધીરે રહીને સજ્જનના કાનમાં કહ્યું, `હે માનવી, જરા આ તરફ નજર નાંખ. આ ગિરીકંદા, નદી, નાળા, વૃક્ષ, ઝરણાં, મયૂર સર્વના હૈયા ભીંજાઈ રહ્યા છે. હવે તું વિચાર કે જો આમાંથી કોઈ એક પણ રેઈનકોટ અપ્નાવે તો તારું શું થાય ?

વિજય રોહિત,

મો : 0990 950 2536

મિત્રો,
શ્રાવણ જેવો પવિત્ર માસ અને ઝરમર વરસાદ વરસતો હોય, મંદિરોમાંથી ઓમ નમ: શિવાયના જાપ જાણે પ્રકૃતિ જપી રહી હોય એવો પડઘમ વરસાદના સૂરમાં ભળીને રેલાતો હોય અને ચારેકોર આ દિવ્યતાના એહસાસમાં ભીંજાયા વિના કોણ રહી શકે ?

મિત્રો, વરસાદમાં ભીંજાવું સહેલું નથી. આજે માણસે ઘણાં બધા પ્રકારના આવરણો, રેઈનકોટો પહેરી લીધા છે. કોઈએ સત્તાનો રેઈનકોટ પહેર્યો છે, કોઈએ સંપત્તિનો, કોઈએ દંભનો તો કોઈએ ઈર્ષ્યાનો રેઈનકોટ પહેર્યો છે એટલે ગમે તેટલો ધોધમાર વરસાદ પડે તોય માનવજાત ભીંજાતી નથી.હકીકતમાં એની ભીંજાવાની દાનત પણ નથી હોતી. બસ નોકરી, ધંધો, ઘર, મારું, તારું એમાંથી ફૂરસદ મળે તો ભીંજાય ને !

અરે આવા આહ્લાદક વાતાવરણમાં પણ એ પ્રકૃતિની મજા એસી રૂમમાં બેસીને ટીવી પર માણે છે. પોતાને સૌથી બુદ્ધિશાળી ગણતા આ માનવીને કોણ સમજાવે કે એકવાર ભીંજાઈશ તો આ બધાજ આવરણો અને રેઈનકોટો પહેરવાની જરૂર નહીં પડે, જ્યારે તારા અંદરનો માંહ્યલો મોર બની નાચતો હશે ત્યારે એસીમાં બેસવાની જરૂર નહીં પડે અને ત્યારે શક્ય છે કે એક સામાન્ય માનવ પણ રસિકજન કે કવિ બની જાય.....

શું કહો છો દોસ્ત...!

વિજય રોહિત,
મો : 0990 950 2536

આ વરસાદ પણ કેટલો રંગીન હોય છે.
એ ફક્ત આકાશમાંથી પાણી નથી વરસાવતો,
સ્નેહની અમૃતધારા વરસાવે છે.
જેમ માં એના દીકરાને વહાલથી સ્નાન કરાવે
એમ ઝાડ-પાન, નદી, પર્વત, મોર સૌને
એ સ્નાન કરાવી નવપલ્લવિત કરે છે.

મિત્રો, આ પ્રકૃતિના સર્વે પ્રતીકો વરસાદની
આતુરતાથી રાહ જોઈ રહ્યા હોય છે.
તેમને ભીંજાવું ગમે છે, ભીંજાવાનો
એક નશાની જેમ આનંદ માણે છે.
એટલે જ એ હંમેશાં તરોતાજા અને જુવાન હોય છે.
પણ મિત્રો જેને વરસાદ જોઈને પણ
ભીંજાવાનું મન થાતું નથી એ ભર જવાનીએ
વૃધ્ધ સમાન જ છે. જ્યારે અવસ્થા ભલે પાનખરની
હોય પણ પહેલા વરસાદમાં જ જો ભીંજાવા દોડી જાય
તો સમજજો કે કાગળની હોડી બનાવીને છબછબીયા
કરતો એ બાળક હજી એનામાં જીવતો છે.

- વિજય રોહિત,
મો : 0990 950 2536

વરસાદમાં

એક છોકરી ભીંજાય છે વરસાદમાં

અને છોકરો ખીજાય છે વરસાદમાં

આમ એકલા ભીંજાવાનું થોડું ચાલે,

એટલે છોકરો રિસાય છે વરસાદમાં

છોકરીને ય ભીંજાવું છે એની સોડમાં

પણ કહેતા શરમાય છે વરસાદમાં

છોકરાએ રેનડાન્સ માટે કર્યું પ્રપોઝ

અને હવે શરમ ભીંજાય છે વરસાદમાં

છોકરીના પ્રેમમાં આવી છે રેલમછેલ

અને બે દિલ એક થાય છે વરસાદમાં

વિજય રોહિત,

મો : 0990 950 2536

તું ગમે છે મને ઓ મીસ

એક છોકરાની ઉંમર છે વીસ,

એને ગમી છે એક બ્યુટીફુલ મીસ.

છોકરાનો પ્રસ્તાવને ફ્રેન્ડશીપ્ની ભીંસ,

એટલે છોકરીએ કીધું બાગમાં મળીશ.

છોકરાના હૈયે થાય પાંચને પાંચ વીસ,

છોકરીને મળવા તેણે લીધું નવું ખમીસ.

આતુર છે મળવા, કયારે વાગે ચાર ને વીસ,

વિચારે છે મળતાંની સાથે પહેલું શું કહીશ ?

ફફડતા હૈયે કહે છે, તું ગમે છે મને ઓ મીસ,

ચાલ એ વાત પર કરવી છે એક લવલી કીસ.

- વિજય રોહિત, મો : 9909502536

પ્રિયે તને મારા સમ,

પ્રિયે તને મારા સમ,
સાચું કહેજે તને ભીંજાવાનું થાય મન...

આ વાદળોની આગોષમાં
કેવી લપાય છે વીજળી,
સાચુ કહેજે આ ઝરમરતા વરસાદમાં
તને વીજળીની જેમ વીંટાવાનું થાય મન...
પ્રિયે તને મારા સમ...

વરસાદના ફોરે ફોરે ઊઠે,
પ્રેમની ઈચ્છાઓનું ઘોડાપૂર
સાચું કહેજે આ ટીપાઓ કરે છે
તારા દિલને નોક,
પ્રિયે, તને ફૂલની જેમ ઊઘડવાનું થાય મન...
પ્રિયે તને મારા સમ...


ક્યારેક વરસે તો ધોધમાર,
તો ક્યારેક સાવ કોરુકટ
સાચું કહેજે ઝાપટાંની આ મોસમમાં,
તને હેલીની જેમ વરસવાનું થાય મન....
પ્રિયે તને મારા સમ...

- વિજય રોહિત, મો : 990 950 2536

ચાલ પલળીએ ડિયર વરસાદમાં,

ચાલ પલળીએ ડિયર વરસાદમાં,
ભીંજવીએ હૈયાને રસધારમાં...

આ ઝરમર વર્ષાનું સંગીત
અને વાદળ ને વીજળીનો રોમાન્સ
ચાલ માણીએ ડિયર વરસાદમાં...
ચાલ પલળીએ ડિયર વરસાદમાં,

આ મોરનો ઉત્સાહ તો જો,
આગમન પહેલાં જ નાચે છે તાનમાં
અને તે બેઠી છે ટીવીના બાનમાં,
ચાલ પલળીએ ડિયર વરસાદમાં,

- વિજય રોહિત, મો : 990 950 2536

કોણે ના પાડી ?

આવી શકો તો આવો, કોણે ના પાડી ?
દિલમાં પ્રેમની ફસલ વાવો, કોણે ના પાડી ?

તમારી દિલફેંક અદાના દીવાના છે અમે,
અંબોડે ગલગોટો લગાવો, કોણે ના પાડી ?

અમોને ઉત્સુકતા છે તમારા આમંત્રણની,
ક્યારેક તો ચા પીવડાવો, કોણે ના પાડી ?

આહ ! શું કામણગારા નયન છે તમારા !
કોકવાર તો કાજળ લગાવો, કોણે ના પાડી ?

અઢી અક્ષરના શબ્દો જ ઝંખના અમારી
એકાદવાર તો ILU સંભળાવો, કોણે ના પાડી ?

- વિજય રોહિત, મો : 990 950 2536

તો શું થયું ?

તને ચાહવો લાગ્યો તો શું થયું ?
તુ ના હસી છતાં હસ્યો તો શું થયું ?

તારી ના પણ ના વિચલાવી શકી મને,
એક તારો હાથ માગ્યો તો શું થયું ?

હું હંમેશાં ખોવાયેલો રહ્યો સપ્નામાં,
હવાના ઝોકાંની માફક અડ્યો તો શું થયું ?

તારા વિના ગમે ના એક પળ મને હવે,
હું મન મૂકીને પાછળ પડ્યો તો શું થયું ?

તું હંમેશાં લીધા કરે મારી પરીક્ષા,
એક દિવસ હું તને નડ્યો તો શું થયું ?

ભલે લોકો કહે પ્રેમ આંધળો હોય છે,
મેં મજનુ માફક પ્રેમ કર્યો તો શું થયું ?

- વિજય રોહિત, મો : 990 950 2536

સપના

ચાલ સપ્નાને સજાવી જોઈએ,
ઊંઘ ને હવે ફોસલાવી જોઈએ.

એ રિસાઈ છે તમારા માટે જ,
હાથ ફેરવીને મનાવી જોઈએ.

આંગણે ગુલાબ તો છે જ બધે.
એક બે બાવળ વાવી જોઈએ.

ભૂલથી ભૂલ્યા હશે એ રાહને,
કોઈને સાચો રાહ બતાવી જોઈએ.

કોણ ના ચાહે `વિજય'ને અંહીયા,
પહેલાં પરાજય પચાવી જોઈએ.

- વિજય રોહિત,
મો : 990 950 2536

પ્રેમના તોલ-માપ

વેઠ્યા છે જિંદગીના ટાઢ-તાપ કદી ?
લાગ્યા છો આફતે કોઈને કામ કદી ?

પ્રેમની વાતો બધી બોદી જ હોય અહીં,
પ્રેમના ક્યાં હોય છે તોલ-માપ કદી.

મને તો સંભળાય છે પ્રકૃતિનો સાદ અહીં,
તમે સાંભળ્યા છે વૃક્ષોને ફૂલોના જાપ કદી,

ઓછું બોલીને તું સાચવ સંબંધ અહીં,
મીઠા ઝાડના મૂળિયાં ન કાપ કદી.

- વિજય રોહિત,
મો : 990 950 2536

રામ જાણે !

કોણે રચ્યા હશે દિવસ-રાત, રામ જાણે !
કયા છે નિર્દેશકનું આ કામ, રામ જાણે !

સૂર્ય, ચંદ્ર, તારલાને ગ્રહો રમે આકાશમાં !
કોણે ચૂકવ્યા હશે એમને દામ, રામ જાણે !

ઊગવું, આથમવું, ભરતી-ઓટ કેટલું ચોક્કસ !
કોની હશે આ ગણતરી તમામ, રામ જાણે !

આ ફૂલો, પંખીને વૃક્ષો કેટલા પરગજુ છે !
એ ક્યારેય લે છે ખરા આરામ, રામ જાણે !

બે શોધ શું કરી ખુદને ઈશ્ર્વર સમજે છે,
એ કેમ કરે છે ચક્કાજામ, રામ જાણે !

- વિજય રોહિત, મો : 990 950 2536

ગઝલમાં

કાફિયા ને રદિફના સંભળાય નાદ ગઝલમાં,
મત્લાથી મક્તાના શેરનો થાય સંવાદ ગઝલમાં.

ક્યાં સરળતાથી રચાતા હોય છે શેર ગઝલમાં,
કેટલું રાખવું પડે છે સૌને યાદ ગઝલમાં.

રદીફ તો એક નો એક જ હોય છે ગઝલમાં,
કાફિયાનો જ હંમેશાં હોય છે વિખવાદ ગઝલમાં

આમ તો હૈયાની વાત જ લખાય છે ગઝલમાં,
વિશ્ર્વાસ છે કે એક દિ મળશે દાદ ગઝલમાં.

ગાલગાગા અને લગાગાગાનો મહિમા છે ગઝલમાં,
મને જાળવજો, અરૂઝની છે ફરિયાદ ગઝલમાં.

પ્રખ્યાત થવાના લાભ પણ થાય છે ગઝલમાં,
હવે ન પૂછ કેમ થાય શાયર આબાદ ગઝલમાં.

મરીઝને ઘાયલ તો બની ગયા અમર ગઝલમાં,
ક્યારે સંભળાશે `વિજય'નો સાદ ગઝલમા


- વિજય રોહિત, મો : 990 950 2536

મા

તરબતર લાગણીનું નામ છે મા,
સદા નીકળે દુઆ એ ધામ છે મા.

દુ:ખના દરિયે સુખ ને આરામ છે મા,
ટાઢ, તડકેને વરસાદે એક વિરામ છે મા.

ક્રિશ્ર્નને પણ વહાલું એક નામ છે મા,
દુનિયાના બધા સુખોનું ધામ છે મા.

ઈશ્ર્વરનું બચી રહેલું કામ છે મા,
વિજયના શતશત પ્રણામ છે મા.


- વિજય રોહિત,
મો : 990 950 2536

ઈમારત કાંઈ એમ જ નથી બનતી

ઈમારત કાંઈ એમ જ નથી બનતી,
ઘણો ભોગ આપે છે પાયાના પથ્થરો,

એક એક પથ્થરનું બલિદાન છે આ ઈમારત,
છતાં લોકો ભૂલી જાય છે પાયાના પથ્થરો,

ગંગનચુંબી ઈમારત બધાને ગમે છે,
બની ગયા પછી ક્યાં આવે પાયાના પથ્થરો

સફળતા પણ જીવનમાં એમ જ નથી મળતી,
નિષ્ફળતાના રૂપમાં હોય છે પાયાના પથ્થરો.

એક સફળ વ્યક્તિની જીવનપોથી ખોલજો,
જોવા મળશે ગુમનામ કેટલાય પાયાના પથ્થરો.

`વિજય' મેળવવો હોય તો બાંધી લો જીવનમંત્ર,
શોધી લાવજો મજબૂત એવા પાયાના પથ્થરો.

- વિજય રોહિત, મો : 990 950 2536

બનાવટી સ્મિત પાસે જ રાખે છે

જુઠ ઉપર જુઠ આપે જ રાખે છે

દંભના હોલસેલ વેપારી છે એ,

ઈર્ષ્યા ને વેર સાથે જ રાખે છે.

સૃષ્ટિ બની ગઈ છે ડામાડોળ,

તોય ઝાડપાન કાપે જ રાખે છે

કોઈ માટે સમય નથી એની પાસે,

દુનિયાભરનો ભાર માથે જ રાખે છે.

એમ ઈશ્ર્વર થોડો સસ્તામાં મળે,

તોય રામનામ જાપે જ રાખે છે.

કરું છું અઢળક પ્રેમ એ છતાંય,

રોજ ફૂટપટ્ટીથી માપે જ રાખે છે.

- વિજય રોહિત, મો : 990 950 2536

બુદ્ધિ અને દિલમાં વેર છે

આમ તો દ્ષ્ટિ દ્ષ્ટિમાં ફેર છે

ને બુદ્ધિ અને દિલમાં વેર છે

ગામની હવા નથી ફાવતી હવે

એટલે જો ને ઠેકઠેકાણે શહેર છે.

તને ફાવશે સલામો ભરવાનું

બાકી આપણને કીધું તો ખેર છે

ગમે ત્યાં શોધો સુખ અને શાંતિ

પણ સાચુ સુખ તો મારે ઘેર છે

- વિજય રોહિત, મો : 990 950 2536

નશો એ સાંજનો કે તારો હતો ?

એ સાંજનું મળવું કેવું હતું ?
દ્શ્ય એ આંખમાં ભરી લેવું હતું
નશો એ સાંજનો કે તારો હતો ?
હજી એ ભ્રમમાં જીવવા જેવું હતું.

- વિજય રોહિત,
મો : 990 950 2536

પ્રેમીઓ બહાનાને તરસે છે.

તમે માનો છો મેઘથી વરસાદ વરસે છે,

હકીકત એ છે કે મોરના ટહુકાને તરસે છે

આ વાદળો ગભરાય છે વીજળીના ચમકારથી,

હકીકત એ છે કે ધરતીના મિલનને તરસે છે.

આ પ્રેમ ઊભરાય છે વરસાદના આગમનથી,

હકીકત એ છે કે પ્રેમીઓ બહાનાને તરસે છે.

આ દુનિયા છે સફળતાની દિવાની,

હકીકત એ છે કે, બધા `વિજય'ને ઝંખે છે.-

વિજય રોહિત, મો : 990 950 2536

દુ:ખમાં સૌ સંબંધો પરખાય છે અહીં

શબ્દોના બજાર ભરાય છે અહીં,

વિધાનો સસ્તામાં વેચાય છે અહીં,

ક્યાં રહી છે મૂછના વાળની કિંમત અહીં,

આબરૂની બોલી સરેઆમ બોલાય છે અહીં,

હવે નથી રહ્યો સ્હેજેય મોહ આ તનનો,

દર્દ કરતાં દવાઓ વધુ ઠલવાય છે અહીં,

કોણ કહે છે કંસ ને રાવણ પાપી છે,

જુલ્મ તો એનાથીયે વધુ થાય છે અહીં

મિત્ર કોણ છે, શત્રુ કોણ છે ખબર નથી,

દુ:ખમાં સૌ સંબંધો પરખાય છે અહીં

- વિજય રોહિત, મો : 990 950 2536

કરોડપતિ થવાની કેવી ધમાલ છે,

કરોડપતિ થવાની કેવી ધમાલ છે,

કેબીસી ને દસ કા દમની બબાલ છે

બધાને થવું છે જલદીથી કરોડપતિ,

પ્રોબ્લેમ એ છે કે થોડા અઘરા સવાલ છે.

કોઈ બને કે ના બને કરોડપતિ,

બિગ બી અને કિંગખાન માલામાલ છે.

જો ચૂકી ગયા હો તો `વિજય'ના છે ચાન્સ,

એકદમ સહેલા, પાંચવી પાસના સવાલ છે.

- વિજય રોહિત, મો : 990 950 2536

મૌનની પણ કેવી ભાષા હોય છે

મૌનની પણ કેવી ભાષા હોય છે,

લાગણીની આ જ પરિભાષા હોય છે

અમે ઝંખીએ છીએ કેવળ પ્રેમના શબ્દો,

અમારી કયાં બીજી કોઈ અભિલાષા હોય છે.

- વિજય રોહિત, મો : 9909502536

આયનાઓ પણ ક્યાં હવે સાચું બોલે છે ?

સીધી વાતોમાં પણ ફેરવે છે ગોળગોળ,
દુ:ખે પેટને માથુ કુટે તો કહેવું કોને ?

આયનાઓ પણ ક્યાં હવે સાચું બોલે છે ?
પણ તસવીર ફૂટે તો કહેવું કોને ?

ક્યાં છે આમલી-પીપળી ને આઈસ-પાઈસ,
આ બાળપણ એમ જ છૂટે તો કહેવું કોને ?

સ્થિતિ પણ ક્યાં બદલાય છે `વિજય',
એક સાંધુ ત્યાં તેર તુટે તો કહેવું કોને ?

- વિજય રોહિત, મો : 9909502536

ભીંજાય છે રાધા આજે પણ પ્રેમમાં

પ્રેમમાં પડવાનો આનંદ જ ઓર છે,
ઋતુઓમાં જાણે વસંત `શિરમોર' છે.

પ્રેમનો લહાવો નસીબદારને જ મળે,
એનો નશો પણ શરાબથી `મોર' છે.

હર એક યુગનું મિલન છે પ્રેમ,
પ્રેમમાં દરેક ક્ષણ `વન્સ મોર' છે.

પ્રેમનો અંત ક્યારેય હોતો નથી સુખદ
એમાં કયાંક આગ તો ક્યાંક `વોર' છે.

ભીંજાય છે રાધા આજે પણ પ્રેમમાં
પણ, કાનુડો ક્યાં `ચિતચોર' છે.-

વિજય રોહિત `મૌલિક',
M : 0990 950 2536

લજામણી શું શરમાય છે.

વિચારોના વાદળા બંધાય છે,
ત્યારે શબ્દરૂપી ગઝલ રચાય છે.

રદીફને ક્યાં વાંધો હોય છે,
કાફિયા ગમે તેટલા બદલાય છે.

સંસારમાં બધા સંબંધો સમજાય છે,
તો'યે માણસજાત ક્યાં ઓળખાય છે.

મક્કમ મનના માનવીની પણ,
દુ:ખમાં જ કસોટી થાય છે.

અમારા સ્પર્શની નજાકત તો જુઓ,
હાથ લગાડું ત્યાં લજામણી શું શરમાય છે.

વાત નીકળી છે તો દૂર સુધી જશે,
આખરે વિચારોનો જ `વિજય' થાય છે.

- વિજય રોહિત, મો : 990 950 2536

વહુ ને વરસાદ કેમ વગોવાય છે ?

શહેરમાં વરસાદે કેવો ત્રાસ ફેલાય છે,
જ્યાં જુઓ ત્યાં ગંદકી ને ગટરો ઊભરાય છે

રસ્તાઓ ટૂટી જાય ને પડે છે ગાબડાં,
ગાડીમાં દોડનારા ધક્કા મારીને જાય છે.

કશું નક્કી નથી હોતું ક્યારે વરસશે એ,
તોયે છૂટવાના સમયે નક્કી દેખાય છે.

ભલે વરસે એ મૂશળધાર ને લાવે એ પૂર,
તોયે ભજિયાં તો વરસાદે જ ખવાય છે.

જરૂર હોય એટલો વરસે તો બધાને ગમે,
નહીં તો ચેનલે અને છાપે ચડાવાય છે.

સંસારચક્ર ચલાવવા જરૂરી છે એનું આગમન,
તોય વહુ ને વરસાદ કેમ વગોવાય છે ?

- વિજય રોહિત, મો : 990 950 2536