વાંસળી વાગે ને

વાંસળી વાગે ને દોડે રાધા,
અડધી રાતે તને શોધે ક્યાં કાના ?

ઘડીમાં ગોકુળ, ઘડીમાં મથુરા
તારા ક્યાં કદી હોય ઠેકાણા
તને આવ્યો ન લગીરે વિચાર,
એ આવે કેમના છાનામાના
વાંસળી વાગે ને દોડે રાધા...

માખણ ચોરે ને ચોરે સૌના દલડાં
મટકી ફોડીને સૌ ચાલ્યા જમના
તને આવ્યો ન લગીરે વિચાર
કે ગોપીની વાત કોણ માનવાના
વાંસળી વાગે ને દોડે રાધા...

માયા લગાડી'તી શું કરવા
જો જાવું જ હતું તારે મથુરા
તને આવ્યો ન લગીર વિચાર
કે તારા વિના રાધા કેમ જીવવાના ?
વાંસળી વાગે ને દોડે રાધા...